العواف عليكو يا فتوكات ليكوا شوقه والنبى اصلى بقالى يجى اسبوع كده مادخلتش المنتدى قولت بقى اما ادخل اشقر عليكو ونهرج سوا شويه ايوه انا قولت احنا بقى ايه ندخل وكل واحده تقول لينا ع مواقف المدرسه بتاعتهيه فوككوا بئى من خالتى اللتاته دى ونخش ع الموضوع
انا هابدأ من ايام ابتدائى
ف يوم كان علينا العاب اتفقنا الفصل كله البنات والولاد يلعبوا لعبه مصرى واسرائيلى وهى عباره اننا بنقسم الفصل نصه مصرى والنص التانى اسرائيلى ونبدأ الحرب احنا ف الاول بدأناها لعب بعد كده قلبت غباوه والاسرائيلين كانوا بياخدو المصريين يعذبوهم بجد وينزلوا عليهم ضرب واحنا المصريين كنا بنخطف الاسرائيلين علشان ناخدهم رهاين ونعذبهم ونضربهم ومسكنا واحد وربطناه ف الشجره ف الجنينه وروحنا نكمل لعب ف الحوش واحنا وقفنا ف اول الحوش والاسرائيلين ف اخر الحوش وقعدنا نزقل بعض بالطوب المدير طلع يحوش دماغه كانت هتتفتح دخل تانى والحمد لله الحصه خلصت والمعركه انتهت كلنا طلعنا الفصل وسبنا الواد مربوط تحت ونسيناه خالص
*****
احنا فصلنا ف ابتدائى كنا كلنا اخوه ومابنحبش حد يدخل بينا ابدا ابدا جه واحد جديد من مدرسه تانيه فصلنا الفصل كله دخل عليه هجوم ومسكنا الواد لزقناه ف الحيطه وقعدنا نضرب فيه وقلعنا الجزم ونزلنا عليه بيها وع طول كده هو كان عامل فيها محترم واكبر من سنه كل اما يكلمنى يقولى يا انسه وانا اتعصب مووووووت من ام الكلمه دى مسكناه انا وصحبتى ضربناه راح يشتكى للمس بيقولها لو سمحتى يا مس الانسه دى ضربتنى بالشلوت قولتلها شوفتى يا مس اهو بيغلط اهوه
******
من الاعمال الشيطانيه اللى فكراها ف ابتدائى لما كان مدرس بيطلع ع الميعاش كانوا بيعملوله حفله ف المدرسه ف مره المدير طلع ع الميعاش وكانوا عملينله حفله وكانوا بيمشوا الطلبه علشان المدرسين بس اللى يحضروا طبعا انا وصحابى لم نسكت ابدا ع هذه المهزله قومنا جبنا صواريخ وفرقعناها تحت الكراسى اللى المدرسين قاعدين عليها قلبناها نووى
***********
وكمان عمل شيطانى فصلنا كان دماغه عليا ومش بيعمل لوح وكان كل مدرس يدخل علينا يدنه يا اخوتشى انتى وهى يقطم فينا يقول ع فصلنا معفن وان 1/6احسن مننا علشان يستفزونا ونعمل لوح احنا كمان بس ع مين احنا استنينا بعد ما العيال روحت وهجمنا ع 1/6 وقطعنالهم كل اللوح وقعنا الديسكات وبهدلنالهم الفصل هما جم تانى يوم شافو المنظر اتصدموا وراحو ضربو 3/6واحنا عملنا فيها غلابه ومالناش دعوه
*********
مره كنت ماشيه انا وصحبتى ف الحوش والعيال عمالين يجروا ويلعبوا راح واحد خبط فيا طلعت اجرى وراه الحووش كله لحد لما علقته من قفاه الواد اتسرع قعد يقولى طب انا اسف وانا اتعصب اكتر واقوله وكمان بتقولى اسف مش هسيبك بس الحمد لله طلع سليم من تحت ايدى
***********
كفايه كده عليكوا لما اشوف مواقفكم بئى هبئى اكمل مواقف الاعدادى والثانوى
